Kechqurun ijtimoiy tarmoqlarda Toshkentdagi «Kosmonavtlar» metro bekati yaqinida tasvirga olingan video tarqaldi. Kadrlarda osmon bo‘ylab tez harakatlanayotgan, ortida aniq iz qoldirayotgan yorqin nurli obyekt ko‘rinadi. Video qisqa vaqt ichida keng tarqalib, foydalanuvchilar orasida muhokamalarga sabab bo‘ldi.
Fanlar akademiyasi Astronomiya instituti mutaxassislari ma’lumotiga ko‘ra, hozircha qayd etilgan hodisa meteorit qulashiga bog‘liq yoki boshqa — tabiiy yoxud texnogen — tabiatga ega, degan xulosaga kelish uchun asos yo‘q.
«Yer yuzasiga yetib kelgan parchalarning aniqlanmaganligi sababli, obyektning xususiyati haqida aniq xulosa berish imkonsiz», — deya ta’kidlashdi institutda.
Olimlar eslatishicha, meteoroidlar Quyosh tizimi doirasida harakatlanuvchi kichik qattiq jismlardir.
Bunday zarrachalar Yer atmosferasiga kirganda, kuchli qizish natijasida yorqin nur paydo bo‘ladi — bu hodisa meteor deb ataladi. Agar obyekt to‘liq yonib ketmay, sayyora yuzasiga yetib kelsa, u meteorit sifatida tasniflanadi.
Mutaxassislar hisob-kitoblariga ko‘ra, har kuni atmosferaga millionlab mayda kosmik zarrachalar kirib keladi. Biroq ularning deyarli barchasi yuqori qatlamlardayoq parchalanib ketadi.
Yer yuzasiga yetib keladigan jismlarning umumiy massasi sutkasiga bir necha o‘n tonnaga baholanadi, shu bilan birga yirik parchalar aholi zich hududlarga qulashi holatlari nihoyatda kam uchraydi.
Astronomiya institutida ma’lum qilinishicha, hodisa bo‘yicha o‘rganish ishlari davom ettiriladi va ma’lumotlar aniqlashtirilgach qo‘shimcha axborot taqdim etiladi.
