Tailand o‘zbekistonliklar uchun vizasiz rejim muddatini 30 kungacha qisqartiradi

Tailand hukumati O‘zbekiston va yana 92 ta davlat fuqarolari uchun vizasiz bo‘lish muddatini 60 kundan 30 kunga tushirishga qaror qildi.

Tailand hukumati chet ellik sayyohlar uchun mamlakatda vizasiz bo‘lish muddatini 60 kundan 30 kunga qisqartirish to‘g‘risida qaror qabul qildi. Khaosod nashrining vazirlar mahkamasi qaroriga tayanib ma’lum qilishicha, mazkur yangi cheklovlar dunyoning 93 ta davlati, shu jumladan O‘zbekiston va Rossiya fuqarolariga ham daxldor bo‘ladi. Eslatib o‘tamiz, mamlakatda turizm sektorini rag‘batlantirish maqsadida 2024-yilning iyul oyidan boshlab O‘zbekiston fuqarolari uchun 60 kunlik vizasiz tartib joriy etilgan edi.

Tailand ommaviy axborot vositalarining yozishicha, qirollik rahbariyati xorijliklar tomonidan sayyohlik rejimidan tijorat maqsadlarida foydalanish hamda noqonuniy mehnat faoliyati bilan shug‘ullanish holatlari ko‘paygani sababli avvalgi 30 kunlik cheklovni qaytarishga majbur bo‘lgan. Yangi tartibning aniq kuchga kirish sanasi hozircha rasman e’lon qilinmadi. Shu bilan birga, mahalliy manbalarning qayd etishicha, sayyohlar uchun mamlakat ichkarisida bo‘lish muddatini yana 30 kunga uzaytirish imkoniyati saqlanib qolinishi mumkin. Tailand o‘zbekistonlik sayyohlar, ayniqsa, qishki ta’til mavsumida eng ko‘p tashrif buyuradigan ommabop yo‘nalishlardan biri bo‘lib qolmoqda.