12-maydan 14-maygacha Shayxontohur tumanining bir qator mahallalarida suv o‘chiriladi. «6-Bozsu» tarmog‘ida qayta ulash ishlari olib boriladi.
Suv o‘chirilishi 12-may kuni soat 09:00 dan boshlanib, 14-may kuni soat 21:00 ga qadar davom etadi. Mazkur chora «6-Bozsu» suv quvurida qayta ulash ishlarini amalga oshirish bilan bog‘liq.
Suv ta’minotidagi cheklovlar tumanidagi «Yangi shahar», «Oqilon», «Sarxumdon», «Chorsu», «Qoratosh», «Zangiota», «Bog‘ko‘cha», «Chaqar» va «Gulbozor» mahallalarini qamrab oladi. Ishlar «Bozsuv» suv inshootidan Kichik halqa avtomobil yo‘ligacha bo‘lgan masofada olib boriladi. Mutasaddilar aholidan uch kunlik ehtiyoj uchun suv zaxirasini oldindan tayyorlab qo‘yishni so‘ramoqda.
Ushbu uzilishlar hududdagi ijtimoiy soha obyektlariga ham ta’sir ko‘rsatadi. Xususan, 14 ta bog‘cha, 12 ta maktab, 4 ta shifoxona va poliklinika, 6 ta masjid hamda 50 ta umumiy ovqatlanish maskanida suv bo‘lmaydi. Suv ta’minoti korxonasi ta’mirlash ishlari yakunlangach, sovuq suv yetkazib berish odatdagi tartibda tiklanishini ma’lum qildi.
