Shavkat Mirziyoyev Turkiston shahrida o‘tadigan TDT norasmiy sammitida qatnashish uchun Qozog‘istonga ketdi. Sammit mavzusi — sun’iy intellekt va raqamli rivojlanish.
O‘zbekiston prezidenti Shavkat Mirziyoyev Qozog‘iston prezidenti Qosim-Jo‘mart To‘qayevning taklifiga binoan Turkiy davlatlar tashkilotining (TDT) norasmiy sammitida ishtirok etish uchun ushbu mamlakatga jo‘nab ketdi. Oliy darajadagi uchrashuv turkiy dunyoning ma’naviy poytaxti hisoblangan Turkiston shahrida bo‘lib o‘tadi.
Bu galgi norasmiy sammit “Sunʼiy intellekt va raqamli rivojlanish” mavzusiga bag‘ishlangan. Yig‘ilish kun tartibidan TDTga a’zo mamlakatlar o‘rtasida savdo-iqtisodiyot, investitsiya, transport-kommunikatsiya va ekologiya sohalarida mintaqaviy hamkorlikni yanada kengaytirishga doir qator muhim masalalar o‘rin olgan.
Sammit doirasida davlatlar yetakchilari raqamli infratuzilmani birgalikda rivojlantirish, yangi innovatsion texnologiyalarni joriy etish hamda sunʼiy intellekt imkoniyatlarini amaliyotda qo‘llash masalalariga alohida eʼtibor qaratishi ko‘zda tutilgan. Tashrif doirasida bir qator ikki tomonlama uchrashuvlar o‘tkazilishi ham rejalashtirilgan.
