O‘zbekistonda Ebola virusining tarqalish xavfi past deb baholanmoqda. Sanitariya-epidemiologik osoyishtalik va jamoat salomatligi qo‘mitasi davlat chegaralarida tibbiy kuzatuv o‘rnatilganini ma’lum qildi.
Qo‘mita xabarida qayd etilishicha, ushbu kasallikning O‘zbekistonda tarqalish xavfi past hisoblanadi. Kasallikni mamlakatga kirib kelishini oldini olish maqsadida, Sanitariya-epidemiologik osoyishtalik va jamoat salomatligi qo‘mitasi mutaxassislari tomonidan davlat chegaralarida kirib kelayotgan fuqarolar tibbiy kuzatuvi olib borilmoqda. “Mamlakatimizda epidemiologik vaziyat barqaror”, deyiladi xabarda.
Shu o‘rinda fuqarolardan Ebola virusi faol tarqalgan mamlakatlar va mintaqalarga sayohat qilmaslik so‘raldi. Ebola virusi kasallangan odam yoki hayvonning biologik suyuqliklari bilan to‘g‘ridan-to‘g‘ri muloqot orqali yuqadi. Shu sababli qo‘mita quyidagi tavsiyalarga amal qilishga chaqirdi:
-
Yovvoyi hayvonlar bilan aloqa qilishdan saqlaning: Primatlar (maymunlar, shimpanzelar) va ko‘rshapalaklar yashaydigan joylarga bormang;
-
Ekzotik taomlardan saqlaning: Yovvoyi hayvonlarning go‘shti yoki xom ovqatlarni yemang;
-
Kasal odamlardan masofa saqlang: Nafas olish yo‘llarida shamollash alomatlari, isitma, toshma yoki qon ketish belgilari bo‘lgan odamlardan xavfsiz masofani saqlang;
-
Shoshilinch gigiyena qoidalariga riyoya qiling: Qo‘llaringizni iloji boricha tez-tez sovun bilan yuving yoki dezinfeksiyalovchi vositadan foydalaning, faqat qadoqlangan yoki qaynatilgan suv iching.
Endemik hududdan qaytganingizdan keyin 21 kun davomida (bu standart inkubatsiya davri) sog‘lig‘ingizni diqqat bilan kuzatib boring. Agar sizda isitma, holsizlik, qusish yoki diareya paydo bo‘lsa, darhol tibbiy yordamga murojaat qiling va shifokoringizga yaqin orada epidemiya xavfi bor hududga sayohat qilganingizni ma’lum qiling.
Ebola virusi — infeksiyasi jiddiy kasallik bo‘lib, ayniqsa Afrika qit’asida tez-tez uchraydi. Bu virus kasallangan hayvonlarning qon, najas, siydik, ter, so‘lagi va boshqa tana suyuqliklari orqali yuqishi mumkin. Ebola virusi infeksiyasini davolashning o‘ziga xos usuli yo‘q, infeksiyalangan odamlarni davolash esa simptomatik terapiya bilan amalga oshiriladi.
Joriy yilda Afrikada Ebola bilan kasallanish bo‘yicha 263 ta tasdiqlangan holat qayd etilgan. Kongo Demokratik Respublikasi epidemiya markazi hisoblanmoqda. JSST Ebola global pandemiya chaqirish ehtimoli past deb baholamoqda. Ebolaga qarshi vaksina yaratish uchun 60 mln dollar ajratildi.
