O‘zbekistonda 2026-yilning birinchi choragida 196 mlrd so‘mlik gaz va elektr energiyasi o‘g‘irlangani aniqlandi. 4 ming tonna sifatsiz yoqilg‘i savdosining oldi olindi.
2026-yilning o‘tgan uch oyi davomida O‘zbekiston energetika tizimiga yetkazilgan zarar miqdori qariyb 200 milliard so‘mga yetdi. Inspeksiya tomonidan o‘tkazilgan reydlar natijasida 885 ta to‘g‘ridan-to‘g‘ri o‘g‘rilik holati qayd etildi. Iqtisodiy zarar ikkita asosiy yo‘nalish o‘rtasida deyarli teng taqsimlangan: elektr energiyasi bo‘yicha 94,4 milliard so‘m (49,7 mln kVt/soat) va tabiiy gaz bo‘yicha 101,6 milliard so‘m (34,6 mln kubometr) miqdorida kamomad aniqlangan.
Faqatgina o‘g‘riliklarni aniqlash bilan cheklanib qolinmasdan, tarmoqdan foydalanish qoidalarini buzgan shaxslarga nisbatan 1 599 ta ma’muriy bayonnoma rasmiylashtirildi. Shuningdek, neft mahsulotlari bozorida ham qat’iy nazorat o‘rnatilib, 180 ta holatda 4 ming tonnadan ortiq sifatsiz yoqilg‘ining sotilishiga chek qo‘yildi. Sifatsiz benzin va solyarika mahsulotlari asosan xususiy AYoQSh va sanoat korxonalarida aniqlangan.
Energiya samaradorligini oshirish maqsadida 2 293 ta yirik iste’molchi qurilmalariga reaktiv energiyani kompensatsiya qiluvchi maxsus uskunalar o‘rnatildi. Ushbu texnologik yechim yirik turar joy massivi iste’moliga teng bo‘lgan 19,4 million kVt/soat elektr energiyasini tejash imkonini berdi. Inspeksiya noqonuniy iste’molga qarshi kurashish barobarida, tizimdagi texnik yo‘qotishlarni kamaytirish bo‘yicha ishlarni davom ettirishini ma’lum qildi.
Izohlar
Hozircha izohlar yo‘q