Davlat agentligi UzAuto Motors va dvigatel zavodidagi davlat ulushlarini sotishini e’lon qildi. Avtogigant ustidan davlatning to‘liq nazorati davri poyoniga yetmoqda.
O‘zbekiston hukumati milliy avtoishlab chiqaruvchini to‘liq xususiy sektorga topshirishga qaror qildi. Davlat aktivlarini boshqarish agentligi UzAuto Motors zavodi hamda UzAuto Motors Powertrain dvigatel ishlab chiqarish korxonasidagi davlat ulushlarini ochiq tenderga qo‘yishga hozirlik ko‘rmoqda. Bu haqda Cbonds xalqaro konferensiyasida DABA direktori o‘rinbosari Alisher Miraliyev ma’lum qildi.
Hozirgi kunda avtokonsern aksiyalarining 99,7 foizi Iqtisodiyot va moliya vazirligi tasarrufida bo‘lsa, qolgan kamchilik 0,3 foiz ulush avvalroq «Toshkent» birjasida IPO orqali joylashtirilgan edi. Zavod tarixi 1992-yilda Daewoo bilan tashkil etilgan qo‘shma korxonadan boshlanib, keyinchalik General Motors bilan alyansga aylandi. 2019-yilda hukumat xorijiy hamkorlarning ulushlarini to‘liq sotib olib, ishlab chiqarish ustidan yagona nazorat o‘rnatdi, biroq GM ehtiyot qismlar yetkazib beruvchi va texnologik hamkor sifatida qoldi.
Davlat monopoliyasi zavodga mislsiz soliq imtiyozlari, doimiy subsidiyalar va kreditlar uchun davlat kafolatlarini ta’minlab berdi. Biroq bozor raqobatining yo‘qligi narxlarning oshishi, eskirgan modellar va avtomobillar importi erkinlashuvi fonida xaridorgirlikning keskin tushib ketishiga olib keldi. Davlat boshqaruvi davrining yakuniy nuqtasi sifatida Chevrolet Suburban lyuks yo‘ltanlamasining taqdimoti bo‘ldi — brend tarixidagi eng qimmat ushbu model mulozimlarga mahalliy mashinalarga o‘tish topshirig‘i berilganidan so‘ng namoyish etilgan edi.
