«Milliy tiklanish» yetakchisi Alisher Qodirov Toshkentdagi ba’zi tarixiy binolar qiymatga ega emasligini aytib, ularni buzish va byudjetni faqat milliy merosga ajratishni taklif etdi.
Siyosatchining ta’kidlashicha, poytaxt markazidagi ayrim eski binolar har qanday evaziga saqlab qolinadigan darajada yetarli qiymatga ega emas.
O‘z chiqishida u bunday ob’yektlarni davlat hisobidan saqlash zaruratini savol ostiga oldi. «U hech kimga kerak emas, bu qaysidir rus rassomining uyi. Uni olib tashlash kerak, bizga uning nima keragi bor? Madaniy meros ob’yekti sifatida uning biz uchun qanday qiymati bor? Uning qanday ahamiyati bor? U Shohi Zindaning hatto mingdan bir qismiga teng keladimi?», — dedi Qodirov.
Partiya rahbari Madaniy meros agentligi birinchi navbatda milliy madaniyatga e’tibor qaratishi, byudjet mablag‘lari esa eng avvalo uni saqlashga yo‘naltirilishi kerakligini ta’kidladi. Chiqishda aynan qaysi bino nazarda tutilganiga aniqlik kiritilmagan.
Ushbu bayonot Toshkentdagi Bobur ko‘chasi, 7-uy manzilida joylashgan tarixiy bino taqdiri atrofidagi muhokamalar fonida yangradi. Avvalroq, 8-sentyabr kuni Madaniy meros agentligi davlat muhofazasida bo‘lgan ushbu ob’yekt bo‘yicha huquqiy baho berishni so‘rab Bosh prokuraturaga murojaat qilgan edi.
Izohlar
Hozircha izohlar yo‘q