O‘zbekiston koreys tili maktablari soni bo‘yicha dunyoda yetakchi bo‘ldi. Bir yil ichida mamlakatda 68 ta yangi ixtisoslashgan maktab ochildi.
O‘zbekiston koreys tili o‘qitiladigan yangi ta’lim muassasalarini tashkil etish sur’atlari bo‘yicha dunyo reytingida peshqadamlikni qo‘lga kiritdi. Yonhap agentligi xabariga ko‘ra, bir yil davomida mamlakatda koreys tili o‘rgatiladigan 68 ta yangi maktab o‘z faoliyatini boshladi. Bu borada respublika Vyetnam, AQSH va Braziliya kabi davlatlarni ortda qoldirishga muvaffaq bo‘ldi.
Mutaxassislar ushbu o‘sishni Janubiy Koreya madaniyatining yoshlar orasidagi ommaviyligi bilan izohlamoqda. K-pop va koreys seriallariga bo‘lgan qiziqish ko‘plab o‘quvchilarni til o‘rganishga va kelajakda Koreya oliy o‘quv yurtlarida tahsil olishga undamoqda.
Shuningdek, Janubiy Koreya hukumati tomonidan maktablarni maxsus adabiyotlar bilan ta’minlash va o‘qituvchilar malakasini oshirish loyihalari ham muvaffaqiyatli amalga oshirilmoqda.
2025-yil yakunlariga ko‘ra, jahon bo‘ylab koreys tili o‘qitiladigan maktablar soni 2,7 mingtaga yetdi va so‘nggi to‘rt yilda 54 foizga o‘sdi. Hozirda Janubiy Koreyadan tashqarida 236 mingdan ortiq kishi ushbu tilni o‘rganmoqda. O‘zbekistonda koreys oliy ta’lim muassasalari filiallarining ko‘payishi va akademik almashinuv dasturlari til o‘rganuvchilar soni yanada ortishiga xizmat qilmoqda.
