O‘zbekiston 21-may kuni Eronga 15 ta yuk mashinasida dori va tibbiy buyumlardan iborat ikkinchi yordam partiyasini yubordi. Birinchi yuk mart oyida yetkazilgan edi.
O‘zbekiston 21-may kuni Eron xalqiga navbatdagi insonparvarlik yordamini yetkazib berdi. Eronning Press TV telekanali xabariga ko‘ra, tibbiy buyumlar va zarur dori-darmonlardan iborat yuklar 15 ta yuk mashinasiga ortilgan holda manzilga yetib borgan. Insonparvarlik ko‘mogi mamlakatga Dargaz quruqlik chegara posti orqali olib kirildi va rasmiy ravishda Eron Qizil yarim oy jamiyati vakillariga topshirildi.
Bu O‘zbekiston tomonidan so‘nggi vaqtlar ichida Eronga yuborilgan ikkinchi yordam karvonidir. Bundan ikki oy avval, ya’ni shu yilning 16-mart kuni ham mamlakatga birinchi partiya yetkazilgan edi. O‘shanda insonparvarlik yordami tarkibidan nafaqat dori-darmonlar, balki un, guruch, shakar, makaron, kungaboqar yog‘i va turli konservalar kabi keng turdagi oziq-ovqat mahsulotlari ham o‘rin olgan edi.
Izohlar
Hozircha izohlar yo‘q