O‘zbekistonda JKX xodimlariga naqd pul yig‘ish taqiqlanib, Mening uyim tizimida badallarni qo‘lda kiritish amaliyoti tugatildi. Jarayon to‘liq avtomatlashtirildi.
Shu bilan birga, Mening uyim yagona billing tizimida ko‘p kvartirali uylarga xizmat ko‘rsatuvchi boshqaruv kompaniyalari hamda shirkatlar tomonidan majburiy badal to‘lovlarini dasturga qo‘lda kiritish tartibi ham bekor qilindi. Mamlakatdagi uy-joy kommunal xizmatlari uchun to‘lov tizimi to‘liq raqamlashtirilayotgan bo‘lib, endilikda barcha hisob-kitoblar faqat avtomatlashtirilgan dasturiy ta’minot orqali, inson omilisiz amalga oshiriladi va badallar faqat shaxsiy elektron hisobvaraqlarga kelib tushadi.
Mazkur yangi mexanizm uy-joy kommunal xo‘jaligi sohasidagi pul oqimlarini shaffoflashtirish va mablag‘larning maqsadli sarflanishi ustidan qat’iy nazorat o‘rnatish maqsadida joriy etilmoqda. Tizimning to‘liq avtomatlashtirilishi tufayli badallar miqdorini asossiz ravishda oshirish yoki dasturga noto‘g‘ri moliyaviy ma’lumotlarni kiritish kabi salbiy holatlarga barham beriladi. Yangi raqamli tartib xizmatlar uchun to‘lovlarning aniq hisoblanishini kafolatlaydi hamda har bir xonadon egasiga o‘zi to‘lagan mablag‘lar aynan qaysi ta’mirlash yoki ekspluatatsiya ehtiyojlariga sarflanayotganini onlayn rejimda shaffof kuzatib borish imkonini beradi.
