O‘zgidromet 1–5-iyun kunlariga mo‘ljallangan ob-havo prognozini e’lon qildi. Aksariyat hududlarda qisqa muddatli yomg‘ir yog‘ib, havo harorati +28…+33 darajagacha pasayadi.
Dushanba kuni kunduzi O‘zbekiston hududining katta qismida quruq ob-havo saqlanib qoladi. Qisqa muddatli yomg‘ir va momaqaldiroq faqat Toshkent viloyati hamda Farg‘ona vodiysining ayrim tumanlarida kuzatilishi mumkin. Havo harorati +34…+36 darajani, respublika janubida esa +38…+40 darajagacha issiqni tashkil etadi.
2-4-iyun kunlari mamlakatda yoz faslining boshlanishiga xos bo‘lgan ob-havo sharoiti bo‘lishi kutilmoqda. Tungi vaqtda va kunning birinchi yarmida kam bulutli ob-havo ustunlik qilsa, kunning ikkinchi yarmida konvektiv bulutlar rivojlanadi va buning oqibatida ayrim hududlarda qisqa muddatli yomg‘ir hamda momaqaldiroq yuz berishi mumkin. Ushbu kunlarda havo harorati asta-sekin +28…+33 darajagacha, janubiy viloyatlarda esa +34…+37 darajagacha pasayadi.
Juma kuni, 5-iyunda qisqa muddatli yomg‘ir va momaqaldiroq faqat Farg‘ona vodiysining ayrim joylarida saqlanib qolishi ehtimoli bor. Havo harorati sezilarli darajada o‘zgarmaydi. Shamol tezligi 7–12 m/s ni tashkil etadi, ba’zi joylarda shabadaning kuchayishi 15–20 m/s gacha yetishi va ayrim hududlarda chang-to‘zonlar kuzatilishi mumkin. Shu bilan birga, 1-5-iyun kunlari respublikaning tog‘ oldi va tog‘li hududlarida joylarda qisqa muddatli yomg‘ir yog‘ishi, momaqaldiroq bo‘lishi hamda sel-suv toshqini hodisalari yuzaga kelishi xavfi mavjud.
Toshkent shahrida 1-iyun kuni qisqa muddatli yomg‘ir va momaqaldiroq bo‘lishi mumkin, harorat +34…+36 daraja atrofida bo‘ladi. 2-4-iyun kunlari kunning ikkinchi yarmida qisqa muddatli yomg‘ir va momaqaldiroq ko‘rinishidagi yog‘ingarchiliklar takrorlanishi ehtimoli bor, kunduzgi harorat esa asta-sekin +29…+31 darajagacha pasayadi. Juma kuni, 5-iyunda poytaxtda yog‘ingarchiliksiz ob-havo o‘rnatilib, havo +31…+33 darajagacha isiydi. Shamol tezligi 3–8 m/s ni tashkil qiladi, vaqti-vaqti bilan 10–15 m/s gacha kuchayishi va shaharning ayrim tumanlarida chang-to‘zonlar ko‘tarilishi kutilmoqda.
