Farg‘onada er-xotin park yoki savdo markaziga borish ustida urishib qolgan. Erini urgan xotinga sud 8,2 mln so‘m miqdorida jarima soldi.
Er-xotin bolalarni aylantirish uchun joy tanlashda, ya’ni bog‘ga yoki savdo markaziga borish borasida o‘zaro tortishib qolishgan. Oradan ikki kun o‘tib, ushbu oilaviy mojaro qaytadan avj olgan va asabiy holatdagi ayol turmush o‘rtog‘ini qo‘llari bilan urib, unga tan jarohati yetkazgan.
Kaltaklangan er ushbu holatga chidab turmasdan, xotinining ustidan huquq-tartibot idoralariga ariza yozgan. Sudda ayol o‘z aybini tan oldi. Sud qaroriga ko‘ra, Farg‘ona viloyatida yashovchi ushbu fuqaro oilaviy zo‘ravonlik sodir etganlikda aybdor deb topildi.
Erini urgani va jarohatlagani uchun ayolga 8,2 million so‘m miqdorida pul jarimasi jazosi tayinlandi.
