Buxoro viloyati Jondor tumanida ikki kunda oltinchi marotaba 4 magnitudali zilzila sodir bo‘ldi. Gazli shahrida tebranish kuchi 2–3 ballga yetdi.
Respublika seysmoprognostik monitoring markazi ma’lumotlariga ko‘ra, Buxoro viloyatida oxirgi ikki sutka ichida oltinchi marotaba yer qimirlashi qayd etildi. Navbatdagi yer osti zarbasi joriy yilning 22-may kuni mahalliy vaqt bilan soat 10:44 da sodir bo‘ldi. Ushbu zilzila magnitudasi 4,0 ni tashkil etgan bo‘lsa, uning o‘chog‘i mazkur hudud uchun odatiy bo‘lgan 10 kilometr chuqurlikda joylashdi. Zilzila episentri yana Jondor tumaniga to‘g‘ri keldi va u poytaxt Toshkent shahridan janubi-g‘arbiy yo‘nalishda 526 kilometr uzoqlikda joylashgan.
Bugun kunduzi yuz bergan er osti tebranishlari Buxoro viloyatining bir nechta tumanlarida yashovchi aholi tomonidan aniq sezildi. Er silkinishining eng yuqori kuchi Gazli shahrida kuzatilib, u yerda tebranishlar 2–3 ball darajasida namoyon bo‘ldi. Zilzila o‘chog‘i joylashgan Jondor tumanida, shuningdek, unga qo‘shni bo‘lgan Peshku va Qorako‘l tumanlarida yer qimirlashi kuchi 2 ballni tashkil etdi. Poytaxt Toshkentda ushbu va bundan oldingi tebranishlarning asoratlari umuman qayd etilmadi.
Mintaqadagi seysmik faollik silsilasi dastlab 20-mayga o‘tar kechasi soat 01:40 da Qorako‘l tumanida yuz bergan 5,3 magnitudali kuchli zilzila bilan boshlangan edi va o‘shanda yer osti to‘lqinlari Navoiy viloyatigacha yetib borgan edi. Shundan so‘ng, 21-may kuni Jondor tumanida 3,4 magnitudali yer silkinishi qayd etilib, Gazlida 2 ball bo‘lib sezildi.
Oxirgi sutka esa tebranishlarga eng boy davr bo‘ldi. Bugun soat 10:44 dagi zilziladan biroz avval, ya’ni soat 10:15 da ayni shu tumanda o‘chog‘i 15 kilometr chuqurlikda bo‘lgan 3,8 magnitudali, tunda esa 4,0 magnitudali yana bir yer qimirlashi ro‘yxatga olingan edi. Seysmologlar Buxoro hududidagi holatni uzluksiz nazorat qilib bormoqdalar.
Izohlar
Hozircha izohlar yo‘q