O‘zbekistonda yozda havo harorati me’yordan yuqori bo‘lib, ayrim hududlarda 47°C gacha ko‘tarilishi kutilmoqda. Sinoptiklar buni El-Ninyo hodisasi bilan bog‘lashmoqda.
Sinoptiklarning ma’lumotlariga ko‘ra, joriy yilgi yoz faslida o‘rtacha havo harorati ko‘p yillik iqlimiy me’yorlardan yuqori bo‘lishi kutilmoqda, shuningdek, anomal issiqlik davrlari kuzatilishi ehtimoli juda yuqori. Iyun oyining oxiriga qadar tungi vaqtlarda havo harorati 18–23°C atrofida bo‘ladi, kunduz kunlari esa dastlab 29–34°C dan keyinchalik 34–39°C gacha ko‘tarilib boradi. Respublika shimoli, janubiy hududlari hamda cho‘l zonalarida esa ayrim kunlari issiqlik ko‘rsatkichlari 40–42°C ga yetadi.
Yoz pallasining ayni qizigan davrida, ya’ni iyul va avgust oylarida asosiy hududlarda havo harorati 42–44°C gacha qizishi mumkin. Cho‘l hududlarida, shimoliy va janubiy viloyatlarning ayrim joylarida esa issiqlik darajasi 45–47°C li ekstremal qiymatlarga yaqinlashishi prognoz qilinmoqda. Amerika iqlimiy prognozlar markazi taqdim etgan global ma’lumotlarga ko‘ra, shu yilning may oyida Tinch okeanida El Ninyo tabiat hodisasi belgilari rasman paydo bo‘lgan, bu esa butun dunyoda, jumladan Markaziy Osiyo mintaqasida ham yoz faslining har qachongidagidan ko‘ra issiqroq kelishi haqidagi taxminlarni yanada kuchaytiradi.
