O‘zbekiston harbiylari o‘rtasida «Ma’naviyat qalqoni» kitobxonlik tanlovi o‘tkaziladi. G‘oliblarga elektromobillar va pul mukofotlari topshirilishi belgilandi.
Prezident matbuot xizmatining xabar berishicha, joriy yildan boshlab harbiylar orasida mutolaa madaniyatini yuksaltirishga qaratilgan yangi intellektual musobaqa yo‘lga qo‘yilmoqda. Tanlov tizimli ravishda tashkil etilib, dastlabki bosqichlar harbiy qismlar va bilim yurtlarida o‘tkaziladi. Keyingi bosqichlarda harbiy okrug va birlashmalar g‘oliblari o‘zaro bellashadi, uchinchi bosqich esa tegishli vazirlik hamda idoralarda bo‘lib o‘tadi. Eng bilimdon harbiylar respublika miqyosidagi final bahslarida o‘z mahoratlarini namoyish etishadi.
Tanlovning taqdirlash marosimi ham yuksak darajada tashkil etilishi ko‘zda tutilgan. Respublika bosqichining to‘rt nafar mutloq g‘olibi Oliy Bosh Qo‘mondonning asosiy sovrini — zamonaviy elektromobil hamda maxsus diplomlar bilan mukofotlanadi. Shuningdek, sovrinli o‘rinlarni egallagan boshqa ishtirokchilar uchun ham salmoqli pul mukofotlari va rag‘batlantiruvchi sovg‘alar belgilangan. Davlat rahbari ushbu tashabbusni ma’qullab, tegishli qarorni imzoladi. Mazkur loyiha armiya safida ma’naviy-ma’rifiy muhitni yanada sog‘lomlashtirishga xizmat qiladi.
