Toshkent viloyati IIBB Jamoat xavfsizligi xizmati Yo‘l harakati xavfsizligi boshqarmasi xodimi oilasida to‘rt egizak dunyoga keldi. Chaqaloqlarning ikki nafari o‘g‘il va ikki nafari qiz.
Poytaxt viloyati huquq-tartibot idoralari tizimida xizmat qilayotgan 29 yoshli safdor Odiljon Abdullayev xonadonida 29-mart kuni katta quvonch yuz berdi. Toshkent viloyati IIBB matbuot xizmati xabariga ko‘ra, yosh xodim bir yo‘la to‘rt nafar farzandning otasiga aylandi.
Hozirda ona va to‘rt egizakning salomatligi mutaxassislar tomonidan barqaror deb baholanmoqda. Chaqaloqlar hamda ularning onasi malakali shifokorlar nazorati ostida bo‘lib, barcha zaruriy tibbiy muolajalar ko‘rsatilmoqda. Ushbu noyob holat soha vakillari va keng jamoatchilik o‘rtasida ijobiy rezonans uyg‘otdi.
