2026-yil 1-mart holatiga ko‘ra O‘zbekistonning oltin-valyuta zaxiralari 67,7 mlrd dollarga yetdi. Oltin hajmi va narxining oshishi asosiy omil bo‘ldi.
Mamlakatimizning moliyaviy «xavfsizlik yostiqchasi» jadal o‘sish sur’atlarini namoyish etmoqda. Markaziy bankning 1-mart holatidagi ma’lumotlariga ko‘ra, yalpi oltin-valyuta zaxiralari hajmi 67,7 mlrd dollarga yetdi. Yil boshidan buyon ushbu aktivlar 13,6 mlrd dollarga yoki 25 foizga oshganini ko‘rish mumkin.
Umumiy qiymatning keskin oshishiga nafaqat jahon bozorida oltin narxining ko‘tarilishi, balki uning jismoniy hajmi ko‘paygani ham sabab bo‘ldi. Xususan, sof oltin miqdori 12,6 mln troya unsiyasidan 13,1 mln troya unsiyasiga yetdi.
Boshqa turdagi valyuta aktivlari hajmi ham sezilarli o‘zgarib, mart oyi boshida 196,1 mln dollarni tashkil etdi. Bu ko‘rsatkich yil boshidagi (93,9 mln dollar) holatga nisbatan 102,2 mln dollargako‘pdir.
Xalqaro zaxiralar tarkibiga kirmaydigan oltin miqdori deyarli o‘zgarmasdan, 52,6 mln dollar darajasida saqlanib qoldi (yil boshida 51,5 mln dollar edi).
Ekspertlarning qayd etishicha, zaxiralarning bunday o‘sishi respublika iqtisodiy barqarorligini ta’minlashda muhim ahamiyatga ega bo‘lib, asosan qimmatbaho metallarning global bozordagi qimmatlashishi bilan izohlanadi.
Izohlar
Hozircha izohlar yo‘q