«Sirdaryo» bojxona posti «Atameken» punkti rekonstruksiyasidan so‘ng odatdagi rejimda ish boshladi. Piyodalar va avtomobillar uchun harakatlanish to‘liq tiklandi.
O‘zbekiston va Qozog‘istonni bog‘lovchi «Sirdaryo» chegara o‘tish punkti odatdagi ish tartibiga qaytdi. Bojxona qo‘mitasi xabariga ko‘ra, qo‘shni davlat hududidagi «Atameken» posti rekonstruksiyasi yakunlanishi munosabati bilan harakatlanish cheklovlari bekor qilindi. Endilikda fuqarolar va transport vositalari uchun chegara orqali o‘tish jarayoni to‘liq tiklangan.
Hozirda Sirdaryo viloyatidagi ushbu post orqali piyodalar va yengil avtomobillar to‘siqlarsiz harakatlanmoqda. Infratuzilmani modernizatsiya qilish natijasida bojxona ko‘rigi va rasmiylashtiruvi sezilarli darajada tezlashdi. Mutasaddilarning ta’kidlashicha, yangilangan sharoitlar chegara hududlarida yashovchi aholi va sayyohlar uchun nazoratdan o‘tish vaqtini qisqartirishga xizmat qiladi.
Bojxona organlari rasmiylashtirish tezligini saqlab qolish uchun yo‘lovchilardan yuk tashish me’yorlariga amal qilishni so‘ramoqda. «Sirdaryo» postining barqaror faoliyati mintaqadagi boshqa nazorat-o‘tkazish punktlariga tushadigan yuklamani kamaytirishi kutilmoqda.
