11-dekabrdan O‘zbekistonda maishiy shovqin va sukunatni buzganlik uchun jarimalar keskin oshiriladi: fuqarolar uchun 3,08 mln so‘mgacha, mansabdorlar uchun 8,8 mln so‘mgacha.
11-dekabrdan e’tiboran O‘zbekistonda maishiy shovqinga qarshi kurashish talablarini buzganlik uchun ma’muriy javobgarlik keskin kuchaytiriladi. Ma’muriy javobgarlik to‘g‘risidagi kodeksga (MJtK) tegishli o‘zgartishlar Prezident tomonidan 9-sentabr kuni imzolangan qonunda ko‘zda tutilgan.
Hujjat bilan MJtKning 192-moddasi yangi tahrirda bayon etilib, jarima miqdorlari sezilarli darajada oshirildi:
-
Fuqarolar uchun: birinchi marta sodir etilganda BHMning 3 baravaridan 5 baravarigacha (1,32 mln so‘mdan 2,2 mln so‘mgacha, ilgari BHMning 1/3 qismi edi), bir yil davomida takroran sodir etilganda — BHMning 5 baravaridan 7 baravarigacha (3,08 mln so‘mgacha);
-
Mansabdor shaxslar uchun: birinchi marta sodir etilganda BHMning 10 baravaridan 15 baravarigacha (4,4 mln so‘mdan 6,6 mln so‘mgacha), takroran sodir etilganda — BHMning 15 baravaridan 20 baravarigacha (8,8 mln so‘mgacha).
Shuningdek, sukunat saqlanishi kerak bo‘lgan vaqt oralig‘iga ham aniqlik kiritildi: ish kunlarida soat 23:00 dan 07:00 gacha, dam olish va bayram kunlarida esa soat 22:00 dan 09:00 gacha (ilgari yagona 23:00 dan 06:00 gacha bo‘lgan vaqt amal qilgan).
Shu bilan birga, belgilangan shovqin me’yorlaridan ortiq bo‘lgan transport vositalarini boshqarganlik uchun MJtKning 125-moddasi bo‘yicha ham choralar kuchaytirildi. Ogohlantirish amaliyoti bekor qilinib, jarima miqdori ikki baravarga — BHMning 0,5 baravaridan 1 baravarigacha (440 ming so‘m) oshirildi.
Izohlar
Hozircha izohlar yo‘q