Parkent ko‘chasini keng ko‘lamli rekonstruksiya qilish ishlari boshlandi. Loyiha doirasida bozorining old qismidan o‘tuvchi 16 tasmali yo‘l keskin o‘zgartirilmoqda. Asosiy maqsad — ortiqcha «asfalt maydonlari»ni qisqartirish hamda haydovchi va piyodalar uchun tushunarli harakatlanish muhitini yaratishdir.
Tartibsiz kenglik o‘rnida keng xavfsizlik orolchalari tashkil etiladi. Bu piyodalarga tor yo‘l chekkalarida to‘planib qolmasdan, yashil chiroqni xavfsiz kutish imkonini beradi.
To‘g‘ri yo‘nalish uchun uchtadan tasma qoldirilib, yo‘lning chetki qismlari avtobuslar uchun maxsus yo‘laklar va tartibli to‘xtash joylariga (cho‘ntaklarga) ajratiladi. Yo‘lning torayishi piyodalar o‘tish masofasini qisqartiradi va yuqori tezlikda xavfli manyovrlar qilish ehtimolini yo‘qotadi.
Hozirgi vaqtda ushbu chorrahaning geometriyasi avariyaviy holatda deb topilgan, shu sababli harakat sxemasi butunlay o‘zgaradi.
Markazdan «Buyuk ipak yo‘li» metrosi tomon hamda Botkin qabristonidan «Pushkin» bekati tomon to‘g‘ridan-to‘g‘ri chapga burilishlar yopiladi. Chapga burilish o‘rniga yangi qayrilib olish joylari tashkil etiladi, bu esa tig‘iz vaqtlarda chorraha yuklamasini kamaytiradi. O‘ngga burilishlar esa maxsus yo‘naltiruvchi orolchalar yordamida svetofor ishorasini kutmasdan amalga oshiriladi.
Rekonstruksiya ishlari magistral bo‘ylab joylashgan barcha yirik tugunlarni qamrab oladi:
-
Kichik halqa yo‘li bilan kesishma: Bu yerda eski ToshMI ko‘prigi tamoyili asosida to‘rt tomonlama syezdlar tizimi joriy etiladi va ko‘prik ustidagi chapga burilishlar butunlay taqiqlanadi.
-
Muhammad Yusuf ko‘chasi chorrahasi: Ortiqcha asfalt qoplamasidan voz kechilib, chorraha haydovchilar uchun tushunarli holatga keltiriladi.
-
«TAPOiCh» uch darajali ko‘prigi: Bu yerda aylanma harakatni tartibga soluvchi svetoforlar o‘rnatiladi. Bu 2016-yildan buyon haydovchilarni chalg‘itib kelayotgan chalkashliklarga barham beradi.
Ushbu kompleks yondashuv Toshkentning eng gavjum ko‘chalaridan birini xavfsiz va mantiqiy tartibga solingan shahar magistraliga aylantirishga xizmat qiladi.
