Jinoyat ishlari bo‘yicha Chilonzor tuman sudida uyining oldida qizga nisbatan shilqimlik qilgan 25 yoshli A. M.ga oid ish ko‘rib chiqildi. Bu haqda shahar sudlari matbuot xizmati xabar bermoqda.
Ish hujjatlariga ko‘ra, voqea mart oyi boshida soat 22:30 atrofida ko‘p qavatli uyning kirish qismida sodir bo‘lgan. Fuqaro A. M. u yerda fuqaro A. S.ni majburan quchoqlab, unga nisbatan uyatsiz harakatlar qilgan.
Sud majlisida A. M. aybiga to‘liq iqror bo‘ldi. U o‘z qilmishini qizni yoqtirib qolgani bilan izohladi, pushaymonligini bildirib, bunday holat boshqa takrorlanmasligini aytdi.
Sud qaroriga ko‘ra, A. M. Ma’muriy javobgarlik to‘g‘risidagi kodeksning 41-1-moddasi 1-qismi (Shahvoniy shilqimlik qilish) bilan aybdor deb topildi. Unga nisbatan 5 sutka ma’muriy qamoq jazosi tayinlandi.
