Aliment to‘lovchilarning chet elga chiqishiga ruxsat berilishi kutilmoqda. Endilikda faqat taqiqlovchi choralar o‘rniga, qarzdorlarga chet elda ishlash va daromad topish orqali qarzlarini uzish imkoniyatini berish rejalashtirilmoqda.
Prezident Shavkat Mirziyoyev raisligida o‘tkazilgan yig‘ilishda amaldagi tizim boshi berk ko‘chaga kirib qolgani ta’kidlandi: ishsizligi sababli puli yo‘q qarzdorlarning mamlakatdan chiqishi taqiqlanishi ularni daromad topish imkoniyatidan butunlay mahrum qilmoqda. 2025-yilgi statistikaga ko‘ra, aliment bo‘yicha 70 mingta shikoyatning qariyb uchdan biri aynan qarzdorlarning ishsizligi sababli yechimsiz qolgan.
Yangi tizim qanday ishlaydi?
-
Individual yondashuv: Chiqishni avtomatik bloklash o‘rniga, mahalla yettiligi va bandlik bo‘limlari qarzdorning ko‘nikmalarini o‘rganadi.
-
Qayta tayyorlash: Ishsizlarga yangi kasb o‘rganish va mahalliy korxonalarda ishga joylashish taklif etiladi.
-
Uch tomonlama kelishuv: Agar shaxs chet elda yuqori daromadli ishda ishlashni xohlasa, maxsus kelishuv imzolash sharti bilan uning chiqishiga ruxsat beriladi. Ushbu hujjat xorijdagi daromadning bir qismi to‘g‘ridan-to‘g‘ri farzandlar ta’minotiga yo‘naltirilishini kafolatlaydi.
Tahlillar shuni ko‘rsatdiki, masalan, Qarshi shahrida ashaddiy qarzdorlarning 75 foizi rasman ishsiz bo‘lgan. Shu bilan birga, daromadini yashirib, «soya»da ishlayotganlar ustidan nazorat kuchaytiriladi. Soliq inspeksiyasi va Bosh prokuratura 700 dan ortiq bolaning huquqlarini ta’minlash uchun bunday shaxslarning real daromadlarini aniqlash choralarini ko‘radi.
