Yangi o‘quv yilida O‘zbekiston maktablari 795 mingdan ortiq 1-sinf o‘quvchilarini qabul qiladi. Hujjat topshirish 20-iyundan boshlanadi, Toshkent va Buxoro esa to‘liq onlaynga o‘tdi.
Hujjat topshirish jarayoni 20-iyundan boshlanadi va u to‘liq my.maktab.uz platformasi orqali amalga oshiriladi. Vazirlik tizim ko‘lamini ikki baravarga kengaytirdi: endilikda 135 ta shahar va tumandagi 5500 dan ortiq maktab onlayn qabulni yo‘lga qo‘yadi. Toshkent shahri va Buxoro viloyatida esa ota-onalar maktabga borib yurishmaydi — bu hududlardagi barcha maktablar yuz foiz elektron formatga o‘tkazildi.
Qabul ikki qismdan iborat bo‘ladi. 20-iyundan 31-iyulgacha arizalar faqat yashash joyi bo‘yicha biriktirilgan mikrohudud doirasida qabul qilinadi. 1-avgustdan boshlab esa boshqa hududlardagi maktablarning bo‘sh o‘rinlariga hujjat topshirish imkoniyati ochiladi. Birinchi sinfga 2026-yil oxirigacha 7 yoshga to‘ladigan bolalar olinadi. 10-avgustga qadar barcha hududlarga 12 turdagi o‘quv qurolidan iborat Prezident sovg‘alari yetkazib beriladi.
Vazirlik bitiruvchilar statistikasini ham ma’lum qildi: joriy yilda maktablarni 621 mingdan ortiq 9-sinf va 472 mingdan ziyod 11-sinf o‘quvchilari tamomladi, ulardan 11 ming nafari oltin va kumush medallarga loyiq ko‘rildi.
