Toshkentning Mirobod tumanida Nukus va Taras Shevchenko ko‘chalari chorrahasida Yutong avtobusi va BYD yengil avtomobili ishtirokida og‘ir yo‘l-transport hodisasi yuz berdi.
“Toshshahartransxizmat” AJ matbuot xizmatining rasmiy ma’lumotlariga ko‘ra, hodisa 2-iyun kuni taxminan soat 15:28 larda Nukus va Taras Shevchenko ko‘chalari chorrahasida sodir bo‘lgan. BYD avtomobili haydovchisi svetoforning taqiqlovchi qizil chirog‘iga chorrahaga chiqib ketgan va 16-sonli yo‘nalishda harakatlanayotgan Yutong avtobusi bilan to‘qnashgan. Zarba oqibatida yengil avtomobilga jiddiy zarar yetgan.
To‘qnashuv natijasida har ikkala transport vositasi haydovchilari tan jarohati olgan. Avtobus haydovchisi hamda og‘ir ahvolda bo‘lgan BYD haydovchisi tez tibbiy yordam mashinasida shifoxonaga yetkazilgan.
Hozirda Toshkent shahar IIBB YHXB xodimlari tomonidan hodisa joyi rasmiylashtirilib, halokatning to‘liq tafsilotlarini aniqlash bo‘yicha surishtiruv ishlari olib borilmoqda.
Izohlar
Hozircha izohlar yo‘q