Afg‘onistonda “Tolibon” rahbari qizlarning nikoh yoshini to‘qqiz yoshga tushiruvchi ва ularning sukut saqlashini nikohga rozilik deb hisoblovchi qonunni imzoladi.
Afg‘onistonda nazoratni qo‘lga olgan “Tolibon” harakati oila qonunchiligiga keskin o‘zgartirishlar kiritdi va ular oila qurish uchun mavjud bo‘lgan barcha yosh cheklovlarini amalda yo‘qqa chiqardi. Harakat oliy rahbari Haybatulloh Oxundzoda tomonidan imzolangan yangi qonun hujjatiga muvofiq, mamlakatda qizlarning o‘n olti yoshga to‘lmasdan turib turmushga chiqishini taqiqlovchi tartib rasman o‘z kuchini yo‘qotdi. Nikoh yoshini belgilashda endilikda an’anaviy sunniylik huquqiy maktabi qoidalariga tayaniladi va unga ko‘ra qiz bolaning balog‘atga yetishishining eng quyi chegarasi to‘qqiz yosh deb e’tirof etiladi.
Shuningdek, yangi oilaviy qonunchilikda nikoh shartnomasini tuzish jarayonida rozilik berish tartibi ham tubdan o‘zgartirildi. Endilikda qiz bolaning oila qurishga bo‘lgan munosabatini aniqlash uchun undan og‘zaki yoki yozma ravishda rozilik so‘rash talab etilmaydi. Yangi huquqiy amaliyotga ko‘ra, unashtirish yoki nikoh marosimi vaqtida voyaga yetmagan qizning shunchaki jim turishi yoki sukut saqlashi uning turmushga chiqishga to‘liq va ixtiyoriy ravishda rozi bo‘lganligini anglatadi. Xorijiy ommaviy axborot vositalarining xabar berishicha, ushbu o‘zgarishlar xalqaro huquqni muhofaza qiluvchi tashkilotlarning keskin e’tirozlariga sabab bo‘lmoqda.
