Mirzo Ulug‘bek tumanidagi 275-maktabda informatika o‘qituvchisi 9-sinf o‘quvchisini darsda kaltaklagani uchun unga nisbatan JKning 105-moddasi bilan jinoiy ish ochildi.
Toshkent shahrining Mirzo Ulug‘bek tumanidagi 275-sonli maktabda o‘qituvchi o‘quvchini kaltaklagani ortidan jiddiy janjal kelib chiqdi. Toshkent shahar IIBB ma’lumotlariga ko‘ra, voqea 19-may kuni informatika darsida sodir bo‘lgan. 2002-yilda tug‘ilgan o‘qituvchi dars jarayoniga xalaqit bergani va talablarni bajarmagani uchun 2010-yilda tug‘ilgan 9-sinf o‘quvchisiga nisbatan kuch ishlatgan. Kaltaklangan o‘smir tan jarohatlari bilan shifokorlarga murojaat qilgan.
Hozirda informatika o‘qituvchisiga nisbatan O‘zbekiston Respublikasi Jinoyat kodeksining 105-moddasi (qasddan badanga o‘rtacha og‘irlikdagi shikast yetkazish) bo‘yicha jinoiy ish qo‘zg‘atildi va tergov harakatlari olib borilmoqda.
Toshkent shahar maktabgacha va maktab ta’limi boshqarmasi hamda huquq-tartibot idoralaridan iborat ishchi guruh maktabdagi holatni to‘liq tekshirmoqda. Mutasaddilar ichki qoidalarga rioya qilmagan va ushbu vaziyatga javobgar bo‘lgan barcha shaxslarga qonun doirasida chora ko‘rilishini bildirdi.
Izohlar
Hozircha izohlar yo‘q