Shavkat Mirziyoyev Uttar-Pradesh shtatidagi vayronkor to‘fon sababli Hindiston rahbarlariga ta’ziya bildirdi. Tabiiy ofat oqibatida 89 kishi halok bo‘ldi.
O‘zbekiston prezidenti Shavkat Mirziyoyev Hindistonning Uttar-Pradesh shtatida yuz bergan kuchli to‘fon va shiddatli yog‘ingarchiliklar oqibatida ko‘plab insonlar qurbon bo‘lgani hamda jarohatlangani munosabati bilan mamlakat rahbariyatiga hamdardlik yo‘lladi. Davlat rahbari o‘z ta’ziyanomasini Hindiston prezidenti Draupadi Murmu va bosh vazir Narendra Modiga yo‘llagan.
Reuters agentligining mahalliy ommaviy axborot vositalariga tayanib xabar berishicha, 13-may kuni oqshom paytida shtatning bir qancha hududlariga yopirilgan vayronkor dovul va kuchli yomg‘irlar oqibatida kamida 89 kishi halok bo‘lgan, yana 53 nafar fuqaro turli darajada tan jarohati olgan. Tabiiy ofat hududdagi infratuzilmaga ham jiddiy zarar yetkazgan.
O‘zbekiston yetakchisi halok bo‘lganlarning oila a’zolari hamda yaqinlariga o‘zining chuqur hamdardligini izhor etib, ushbu og‘ir damda ularga sabr-toqat tiladi. Shuningdek, jarohat olgan barcha fuqarolarning tez fursatlarda sog‘ayib ketishini tilashini bildirdi.
