O‘zbekistonda 1973 ta kompaniya jami 3 trillion so‘m soliq qarzini to‘lamagan. Eng ko‘p qarzdorlik Toshkent shahri va ishlab chiqarish sohasida kuzatildi.
Davlat soliq qo‘mitasi mamlakatdagi yirik soliq qarzdorliklariga oid ma’lumotlarni e’lon qildi. Unga ko‘ra, respublika bo‘yicha 1973 ta tashkilotning har biri 100 million so‘mdan ortiq miqdorda soliq bo‘yicha qarzdorlik to‘plagan. Ushbu korxonalarning jami qarzi qariyb 3 trillion so‘mga yetgan.
Qarzdorlik hajmi bo‘yicha Toshkent shahri yetakchilik qilmoqda — poytaxtdagi qurilish korxonalari budjetga 958,3 milliard so‘m to‘lamagan. Keyingi o‘rinlarni Andijon viloyati (666,1 milliard so‘m) va Toshkent viloyati (225,5 milliard so‘m) egallagan.
Alohida qayd etilishicha, ishlab chiqarish sohasidagi 845 ta tashkilotning soliq qarzi 671,6 milliard so‘mdan oshgan. Ushbu summaning chorak qismi (25,1 foizi) yoki 168,5 milliard so‘mi bor-yo‘g‘i 10 ta yirik korxona hissasiga to‘g‘ri keladi. Ishlab chiqarish tarmog‘ida eng ko‘p qarzdorlik Yirik soliq to‘lovchilar bo‘yicha hududlararo soliq inspeksiyasida (181 milliard so‘m), shuningdek, Toshkent (71,2 milliard so‘m) va Farg‘ona (57,1 milliard so‘m) viloyatlarida qayd etilgan.
Izohlar
Hozircha izohlar yo‘q