O‘zbekistonda chegara ostidan tunnel qaziganlar qamoqqa olinishi mumkin. Yangi qonun loyihasi yer osti yo‘llari orqali kontrabanda olib o‘tganlik uchun jazoni kuchaytiradi.
Qonunchilik palatasi deputatlari davlat chegarasini buzish bilan bog‘liq jinoyatlar uchun jazo choralarini kuchaytirishga doir qonun loyihasini birinchi o‘qishda qabul qildilar. Yangi hujjat bilan Jinoyat va Jinoyat-protsessual kodekslariga qo‘shimcha normalar kiritilmoqda. Endilikda chegara orqali noqonuniy yer osti yo‘llari va tunnellar qurish, ulardan foydalanish hamda bunday faoliyatni moliyalashtirish uchun alohida jinoiy javobgarlik joriy etiladi.
Loyihaga ko‘ra tunnellar yordamida tovar-moddiy boyliklarni, xorijiy valyutani va qimmatbaho metallarni bojxona nazoratini chetlab o‘tib olib o‘tish og‘irlashtiruvchi holat sifatida baholanadi. Shuningdek yer osti inshootlari orqali mamlakatga noqonuniy kirish yoki chiqish uchun ham jazo choralari keskinlashtirilmoqda. Deputatlarning qayd etishicha ushbu choralar jamoat xavfsizligini ta’minlash va transchegaraviy jinoyatchilikka qarshi kurashishda muhim ahamiyatga ega bo‘ladi.
