O‘zbekistonda valyuta obligatsiyalari muomalasi bo‘yicha yangi tartib tasdiqlandi. Emitentlar 50 mln dollargacha qimmatli qog‘oz chiqarishi va valyutada daromad to‘lashi mumkin.
Yangi tartibga ko‘ra, xo‘jalik sub’yektlari «tartibga solish qumdoni» doirasida chet el valyutasida qarz qog‘ozlarini chiqarishlari mumkin. Bir emitent uchun chiqarilgan obligatsiyalarning umumiy miqdori 50 million AQSh dollaridan oshmasligi belgilangan. Obligatsiyalar bo‘yicha foizlar va asosiy qarz to‘lovlari ham to‘g‘ridan-to‘g‘ri xorijiy valyutada amalga oshiriladi.
Nizomda investorlar huquqlarini himoya qilish maqsadida bir qator moliyaviy talablar o‘rnatilgan. Xususan, agar chiqarilayotgan obligatsiyalar miqdori kompaniyaning o‘z kapitalidan ko‘p bo‘lsa, ortiqcha qismi uchun ko‘chmas mulk yoki bank kafolati kabi ta’minot talab etiladi. Shuningdek, jismoniy shaxslar ushbu qimmatli qog‘ozlarni faqat bank tizimi orqali sotib olishlari mumkin, naqd pulda hisob-kitob qilish taqiqlanadi. Mazkur yangilik mahalliy korxonalarga xorijiy valyutadagi investitsiyalarni jalb qilish va kapital bozorini jonlantirish uchun yangi vosita bo‘lib xizmat qiladi.
