21-apreldan boshlab respublika bo‘ylab nam havo oqimi kirib keladi. O‘zgidromet momaqaldiroq, kuchli shamol va sel kelish xavfi haqida ogohlantirish bilan chiqdi.
Respublika hududiga nam va nisbatan salqin havo massalari kirib kelishi natijasida ob-havo sharoiti o‘zgaradi. O‘zgidromet ma’lumotlariga ko‘ra, 21-23 aprel kunlari ko‘plab viloyatlarda qisqa muddatli yomg‘ir yog‘ib, momaqaldiroq bo‘lishi ehtimoli yuqori. Hafta boshidagi +29 darajali issiq harorat o‘rnini +18…+23 darajali mo‘tadil iqlim egallaydi. Shuningdek, ayrim hududlarda shamol tezligi soniyasiga 20 metrgacha kuchayib, chang-to‘zonlarni yuzaga keltirishi mumkin.
Tog‘li va tog‘oldi hududlarda yomg‘ir yog‘ishi natijasida sel-suv toshqinlari xavfi e’lon qilindi. Toshkent shahrida 21-aprel kuni kechki soatlarda boshlanadigan yog‘ingarchilik 22-23 aprel kunlari ham davom etishi prognoz qilinmoqda. Payshanba kuni poytaxtda havo harorati +20…+22 darajagacha pasayadi. Ammo juma kunidan boshlab bulutlar tarqaladi va quyoshli ob-havo qaytishi bilan harorat yana ko‘tarila boshlaydi. Sharqiy yo‘nalishdagi shamol poytaxtda 12-14 m/s gacha kuchayishi mumkin.
