Qoraqalpog‘iston va yana bir qator viloyatlarda shamol tezligi soniyasiga 20 metrgacha kuchayishi ma’lum qilindi. Mutaxassislar aholini chang bo‘ronidan ehtiyot bo‘lishga chaqirmoqda.
Sinoptiklarning ma’lumotiga ko‘ra, Qoraqalpog‘iston Respublikasi, Xorazm, Buxoro, Navoiy, Jizzax, Sirdaryo va Surxondaryo viloyatlarida shamol tezligi soniyasiga 15–20 metrgacha kuchayishi kutilmoqda. Shamolning kuchayishi ayrim joylarda chang-to‘zon va chang bo‘ronlarining yuzaga kelishiga sabab bo‘lishi mumkin.
Bunday ob-havo sharoitida ko‘rish darajasi pasayishi ehtimoli yuqori bo‘lgani sababli haydovchilardan yo‘llarda ehtiyotkorlikni oshirish so‘raladi. Shuningdek, aholiga kuchli shamol vaqtida daraxtlar, yengil konstruksiyali reklama vositalari hamda elektr tarmoqlari yaqinida turmaslik tavsiya etiladi. Mutasaddi idoralar fuqarolardan xavfsizlik qoidalariga qat’iy rioya qilishni so‘rab qoladi.
