9-aprelga o‘tar kechasi Shayxontohur tumanidagi «Ganga» ko‘prigida 16 yoshli maktab o’quvchisi boshqaruvni yo‘qotib, qarama-qarshi yo‘nalishga chiqib ketdi va KIA bilan to‘qnashdi. Uch nafar o‘smir jarohatlandi.
9-aprelga o‘tar kechasi Toshkentning Shayxontohur tumanida voyaga yetmagan haydovchi ishtirokida og‘ir yo‘l-transport hodisasi yuz berdi. Taxminan soat 03:30 larda Sebzor ko‘chasidagi «Ganga» ko‘prigida 16 yoshli o‘smir (2009-yilda tug‘ilgan) Lacetti rusumli avtomobil boshqaruvini yo‘qotgan.
Boshqaruv yo‘qotilishi natijasida transport vositasi ajratuvchi chiziqni kesib o‘tib, qarama-qarshi yo‘nalishga chiqib ketgan va 22 yoshli haydovchi boshqaruvidagi KIA avtomobili bilan to‘qnashgan.
Toshkent shahar IIBB YHXB matbuot xizmati ma’lumotlariga ko‘ra, hodisa oqibatida Lacetti haydovchisi va uning salonida bo‘lgan ikki nafar tengdoshi jarohat olgan. Jabrlangan uch nafar o‘smirga tibbiy yordam ko‘rsatilgan. KIA haydovchisining holati bo‘yicha ma’lumot berilmagan. Hozirda huquq-tartibot idoralari tomonidan tergovga qadar tekshiruv o‘tkazilib, voyaga yetmagan bolaning rulga qanday o‘tirib qolgani va avtomobil egalarining javobgarlik masalasi o‘rganilmoqda.
Izohlar
Hozircha izohlar yo‘q