O‘rtachirchiq tumanidagi xonadonda sodir bo‘lgan yong‘in va portlash oqibatida ota va uning uch farzandi vafot etdi. Marhumning turmush o‘rtog‘i va onasi shifoxonaga yotqizilgan.
Toshkent viloyati O‘rtachirchiq tumani «O‘rta Ovul» mahallasida mudhish fojia yuz berdi. 16-aprel kuni tunda xonadonlarning birida kuchli portlash sodir bo‘lib, buning oqibatida kelib chiqqan yong‘in bir oilaning to‘rt nafar a’zosi hayotiga zomin bo‘ldi.
Hodisa oqibatida 1996-yilda tug‘ilgan erkak hamda uning uch nafar voyaga yetmagan farzandi vafot etdi.
Guvohlarning ta’kidlashicha, oila boshlig‘i o‘z hayotini xavf ostiga qo‘yib, yaqinlarini qutqarishga harakat qilgan. U rafiqasi va onasini derazadan tashqariga chiqarib yuborishga ulgurgan, biroq farzandlarini qutqarish uchun uyga qaytganida alanga ichida qolib halok bo‘lgan.
Hozirda ikki nafar ayol og‘ir ahvolda shifoxonada qolmoqda. Mas’ul idoralar voqea joyida o‘rganish ishlarini olib bormoqda, portlashning aniq sabablari rasman ochiqlanmagan.
