Uzbekistan Airways Toshkentdan Isroilga muntazam parvozlarni qayta yo‘lga qo‘ydi. May oyidan boshlab Isroilga Samarqand orqali ham qo‘shimcha reyslar amalga oshirilishi kutilmoqda.
Uzbekistan Airways aviakompaniyasi 14-apreldan e’tiboran Toshkent — Tel-Aviv — Toshkent yo‘nalishi bo‘yicha muntazam parvozlarni tikladi. O‘zbekistonning Isroildagi elchixonasi ma’lumotiga ko‘ra, ayni paytda reyslar haftasiga uch marta — dushanba, seshanba va payshanba kunlari amalga oshirilmoqda. Mart oyi oxirida xavfsizlik choralari sababli ushbu yo‘nalishdagi qatnovlar vaqtincha to‘xtatilgan edi.
Parvozlar jadvali may oyidan boshlab yanada kengaytiriladi. Xususan, 3-maydan boshlab yakshanba kunlari Toshkent — Samarqand — Tel-Aviv va qaytish yo‘nalishida qo‘shimcha reyslar yo‘lga qo‘yilishi rejalashtirilgan. Bu hududlardagi yo‘lovchilar uchun Isroilga borish va qaytishda qo‘shimcha qulayliklar yaratadi.
