O‘zbekistonning to‘rtta viloyatida marokash sarchasi paydo bo‘ldi. Mutaxassislar 650 ming gektar maydonni himoya qilish uchun kimyoviy ishlov berishni boshladi.
O‘zbekiston qishloq xo‘jaligi hududlarida marokash sarchasining paydo bo‘lishi munosabati bilan favqulodda nazorat choralari ko‘rilmoqda. Vazirlar Mahkamasi huzuridagi ixtisoslashtirilgan inspeksiya ma’lumotlariga ko‘ra, hozirda zararkunandalar rivojlanishning dastlabki bosqichida (1–2 yosh) bo‘lib, bu ularni samarali cheklash imkonini beradi. Hozirgi kunga qadar 3600 gektardan ortiq maydonda kimyoviy ishlov berish yakunlandi, jami 22 ming gektardan ziyod yer doimiy kuzatuv ostiga olingan.
Joriy mavsumda respublika bo‘yicha jami 650 ming gektardan ortiq maydonni sarchadan himoya qilish rejalashtirilgan. Buning uchun qariyb 200 ta purkagichli traktor va 1000 dan ortiq maxsus texnika vositalari safarbar etilgan. Mamlakatda sarchaning 200 ga yaqin turi mavjud bo‘lsa-da, faqatgina 6–8 turi qishloq xo‘jaligi ekinlari uchun real xavf tug‘diradi.
Hozirda 700 nafar mutaxassisdan iborat tezkor guruhlar kecha-yu kunduz navbatchilik tizimida ishlamoqda. Ta’kidlash joizki, ekin maydonlariga kimyoviy ishlov berish davlat hisobidan mutlaqo bepul amalga oshiriladi. Mutasaddilar fuqarolardan yangi zararkunanda o‘choqlari aniqlanganda darhol 1288 qisqa raqami yoki (71) 202-10-00 telefoniga xabar berishni so‘ramoqda.
Izohlar
Hozircha izohlar yo‘q