Sanoat, radiatsiya va yadro xavfsizligi qo‘mitasi radioaktiv ob’ektlarni tashish tartibini belgiladi. Yangi qoidalar uran va plutoniy kabi moddalarni qadoqlash, tashish xavfsizligini ta’minlash hamda ularni boshqa xavfli yuklar bilan birga olib yurishni taqiqlashni ko‘zda tutadi.
O‘zbekistonda radioaktiv materiallarni xavfsiz tashish bo‘yicha yangi talablar kuchga kirdi. Sanoat, radiatsiya va yadro xavfsizligi qo‘mitasi qarori bilan tasdiqlangan hujjat uran yoki plutoniyni qadoqlash hamda yetkazib berish jarayonida aholi va ekologiyaga zarar yetishining oldini olishga qaratilgan. Xususan, radioaktiv moddalarni boshqa xavfli yuklar bilan birga tashish va qadoqlarga suv tegishi qat’iyan man etiladi.
Yengillik faqat modda vazni 300 grammdan oshmagan va undagi izotopi miqdori 1 foizdan kam bo‘lgan holatlar uchungina ko‘zda tutilgan. Boshqa barcha vaziyatlarda xavfsizlik choralari to‘liq hajmda qo‘llanilishi shart.
Ushbu tartib-taomillarning joriy etilishi 2026-yilning yozida qurilishi boshlanadigan O‘zbekistondagi ilk AES loyihasi bilan bog‘liq. Hozirda qurilish maydonchasida beton quyish ishlari boshlab yuborilgan. Strategik ob’ekt qurilishida jami 13 mingga yaqin mutaxassis, jumladan 10 ming nafar mahalliy va 3 ming nafar rossiyalik xodimlar ishtirok etishi rejalashtirilgan.
Izohlar
Hozircha izohlar yo‘q