O‘zbekistonda futbol o‘yinlari kechki vaqt va dam olish kunlariga ko‘chiriladi. Prezident sohani foyda keltiradigan tarmoqqa aylantirishni maqsad qilgan.
Davlat rahbari huzurida o‘tgan yig‘ilishda milliy chempionat o‘yinlariga muxlislar tashrifi kutilganidan past ekani tanqid qilindi. Asosiy sabablardan biri sifatida ayrim uchrashuvlarning ish vaqtida o‘tkazilishi ko‘rsatildi.
Vaziyatni o‘zgartirish uchun mas’ullarga o‘yinlarni soat 19:00 dan keyinga yoki dam olish kunlariga belgilash bo‘yicha dastur ishlab chiqish vazifasi yuklatildi. Ushbu choralar futbol klublarining tushumlarini bir necha barobarga oshirish imkonini berishi ko‘zda tutilgan.
Stadionlar atrofida xizmat ko‘rsatish sohasini rivojlantirishga ham alohida e’tibor qaratiladi. Endilikda o‘yinlar oldidan ko‘ngilochar va musiqiy tadbirlar tashkil etiladi, muxlislar uchun qulay transport qatnovi yo‘lga qo‘yiladi. Shuningdek, raqib jamoa tarafdorlari uchun maxsus futbol turpaketlari joriy etilishi rejalashtirilgan.
Bu sa’y-harakatlar futbolni nafaqat sport tomoshasi, balki tadbirkorlar uchun qo‘shimcha daromad manbai va aholi uchun mazmunli hordiq maskaniga aylantiradi.
Yig‘ilishda hududlardagi sport infratuzilmasining holati ham muhokama qilindi. Ma’lum bo‘lishicha, mamlakatdagi 39 ta sport obyekti ta’mirtalabligi sababli to‘liq quvvatda ishlamayapti.
Shu munosabat bilan ushbu obyektlarni davlat-xususiy sheriklik asosida tadbirkorlarga berish bo‘yicha qaror loyihasini tayyorlash topshirildi. Investorlar tomonidan modernizatsiya qilingan majmualar aholi salomatligini mustahkamlash bilan birga, zamonaviy sport maskanlari sifatida xizmat qiladi.
Izohlar
Hozircha izohlar yo‘q