2026-yil aprel holatiga ko‘ra, O‘zbekiston harbiy-havo kuchlari dunyoda 55-o‘rinni egalladi. Mamlakat aviatsiya parkida 159 ta texnika mavjud bo‘lib, ularning asosiy qismini vertolyotlar va qiruvchi samolyotlar tashkil etadi.
O‘zbekiston harbiy-havo kuchlari Global Firepower portalining 2026-yil aprel oyi uchun e’lon qilingan reytingida yuqori natija ko‘rsatdi. Dunyoning 145 ta davlati harbiy aviatsiyasi baholangan mazkur ro‘yxatda mamlakatimiz 55-pog‘onani egalladi.
Hozirgi vaqtda respublika qurolli kuchlari ixtiyorida jami 159 ta uchish apparati mavjud. Aviatsiya parkining asosini 101 ta vertolyot hamda 26 ta qiruvchi samolyot tashkil qilmoqda. Shuningdek, armiya tarkibida 13 ta shturmovchi, 12 ta transport va 7 ta o‘quv-mashg‘ulot samolyotlari xizmatda turibdi.
O‘zbekiston aviatsiyasi tarkibidan Mig-29, Su-25, Su-27 kabi jangovar samolyotlar, shuningdek, Il-76 va S295 transport texnikalari o‘rin olgan. Vertolyotlar qatorida Mi-24, Mi-8 va Airbus H215M kabi zamonaviy modellar faol qo‘llanilmoqda. Reytingning yuqori uchligini AQSH (13 mingdan ortiq texnika), Rossiya va Xitoy egallagan bo‘lsa, Lyuksemburg va Serra-Leone kabi davlatlar bor-yo‘g‘i bittadan samolyotga ega.
Izohlar
Hozircha izohlar yo‘q