Markaziy bank antifrod tizimlarini 24/7 rejimida ishlatish va shubhali o‘tkazmalarni real vaqtda to‘xtatishga qaratilgan yangi nizom loyihasini muhokamaga qo‘ydi.
Hujjatga muvofiq, moliyaviy muassasalarning antifrod tizimlari sutkasiga 24 soat va real vaqt rejimida uzluksiz ishlaydi. Mobil ilova, internet-banking va bank kartalari orqali amalga oshirilayotgan barcha tranzaksiyalar skoring asosida baholanib, ijtimoiy muhandislik va firibgarlik alomatlari aniqlansa, operatsiya vaqtincha to‘xtatiladi.
Shubhali to‘lov to‘xtatilgan yoki rad etilgan taqdirda, bank mijozni darhol xabardor qiladi va operatsiyani tasdiqlash uchun qo‘shimcha verifikatsiyadan o‘tkazadi.
Xalqaro tajriba, moliya bozori ishtirokchilarining axborot almashinuvi va statistika
Yangi tartib Yevropa Ittifoqi, Buyuk Britaniya hamda Singapur tajribasi asosida ishlab chiqilgan bo‘lib, moliya bozori ishtirokchilari o‘rtasida yangi firibgarlik sxemalari bo‘yicha o‘zaro axborot almashish tizimini yo‘lga qo‘yishni ko‘zda tutadi.
Banklar va to‘lov tashkilotlari uchun mijozlarning firibgarlik borasidagi murojaatlarini tunu kun qabul qilish hamda yirik hodisalar haqida Markaziy bankni zudlik bilan xabardor qilish majburiyati yuklatilmoqda.
Ma’lumot uchun, 2026-yilning birinchi yarim yilligida O‘zbekiston tijorat banklari tomonidan umumiy qiymati 461 milliard so‘mdan ortiq bo‘lgan 18 milliondan ziyod firibgarlik operatsiyalarining oldi olingan.
