Chevrolet brendining bozordagi ulushi 79,3 foizgacha kamaydi. UzAuto Motors sotuvlari o‘sgan bo‘lsa-da, BYD va Kia kabi raqobatchilar ancha yuqori sur’atlar bilan bozor ulushini qayta taqsimlamoqda.
2026-yilning birinchi choragi yakunlari O‘zbekiston avtomobil bozorida jiddiy o‘zgarishlar yuz berayotganini ko‘rsatdi. Chevrolet brendining bozordagi ulushi o‘tgan yilgi 82,6 foizdan 79,3 foizga tushib ketdi. Bozor umumiy hisobda 21 foizga o‘sgan bo‘lsa-da, UzAuto Motors’ning 12 foizlik o‘sish ko‘rsatkichi raqobatchilarning shiddatli harakati fonida yetarli bo‘lmadi. Xususiy sektor va elektromobillar segmenti asosiy drayverga aylandi.
Xususan, BYD brendi sotuvlarini 93 foizga oshirib, qariyb 7,8 mingta avtomobil sotishga muvaffaq bo‘ldi. Yuan Up modeliga bo‘lgan talab esa bir yilda 5,2 barobarga ko‘paydi. ADM Jizzakh zavodi tomonidan ishlab chiqarilayotgan Kia avtomobillari ham 65 foizli o‘sish qayd etdi, Kia Sonet esa eng xaridorgir xorijiy rusumdagi modelga aylandi. Chevrolet modellaridan Cobalt sotuvida 17 foizlik pasayish kuzatilgan bo‘lsa, Onix (156%) va Tracker (55%) savdosi keskin oshdi.
Izohlar
Hozircha izohlar yo‘q