O‘zbekistonda mahalladagi tartibni saqlash uchun jamoat yordamchilari jalb etiladi. Profilaktika inspektorlari ortiqcha vazifalardan ozod etiladi.
O‘zbekistonda mahallalardagi xavfsizlikni ta’minlash va tartibni saqlashda inspektorlarga ko‘maklashadigan jamoat yordamchilari instituti tashkil etiladi. Yangi tizimga ko‘ra, yordamchilar maishiy nizolardan tortib, mayda huquqbuzarliklargacha bo‘lgan muammolarni o‘z vaqtida aniqlashda ishtirok etadilar. Bu chora profilaktika inspektorlariga asosiy vaqtini aholi bilan bevosita ishlashga hamda jinoyatchilikning oldini olishga sarflash imkonini beradi.
Hozirda respublika bo‘yicha 10 mingdan ortiq profilaktika inspektori faoliyat yuritmoqda. O‘tgan yili ular tomonidan 2,5 milliondan ziyod murojaatlar ko‘rib chiqilgani sohadagi katta ish hajmidan dalolat beradi. Yig‘ilishda inspektorlarni o‘zlariga tegishli bo‘lmagan vazifalardan xalos etish zarurligi ta’kidlandi. Endilikda ular ortiqcha qog‘ozbozlikdan yiroqlashib, mahalla tinchligi uchun mas’ul bo‘lgan asosiy kuchga aylanadi.
Shuningdek, profilaktika inspektorlarining maktab psixologlari va xotin-qizlar faollari bilan o‘zaro hamkorligi kuchaytiriladi. Bu yoshlar o‘rtasidagi va oilalardagi muammolarni boshlang‘ich bosqichda aniqlash hamda ularni bartaraf etishga yordam beradi. Davlat rahbari ushbu yo‘nalishdagi ishlarni jadallashtirish bo‘yicha aniq qarorlar loyihasini tayyorlashga ko‘rsatma berdi.
