Prezident Shavkat Mirziyoyevga bolalar huquqlarini himoya qilish bo‘yicha yangi tashabbuslar taqdim etildi. Bolalar pornografiyasini saqlaganlik uchun javobgarlik joriy etiladi va nogironligi bo‘lgan bolalar oilalariga soliq imtiyozlari beriladi.
O‘zbekistonda bolalar xavfsizligini ta’minlash va ularning huquqlarini himoya qilish borasidagi qonunchilikka muhim o‘zgarishlar kiritilmoqda. Yangi tashabbuslarga ko‘ra, bolalar pornografiyasini tarqatish maqsadida saqlaganlik uchun avval ma’muriy, ushbu holat takrorlanganda esa jinoiy javobgarlik belgilanadi. Shuningdek, 16 yoshga to‘lmagan shaxslarga nisbatan internet va ijtimoiy tarmoqlar orqali amalga oshirilgan har qanday buzuq harakatlar uchun jazo choralari yanada og‘irlashtiriladi.
Ijtimoiy sohada ham qator yengilliklar ko‘zda tutilgan. Xususan, tug‘ma nuqsoni bo‘lgan bolalarning barcha qo‘shimcha tekshiruv va jarrohlik amaliyotlari davlat tomonidan Tibbiy sug‘urta jamg‘armasi orqali qoplanadi. 2026-yil yoziga qadar rivojlanishida nuqsoni bor uch yoshgacha bo‘lgan bolalar uchun erta yordam dasturi ishga tushiriladi.
Nogironligi bor farzandini parvarishlayotgan ota-onalar uchun alohida soliq imtiyozi berilib, ularning 3 million so‘mgacha bo‘lgan oylik daromadlari daromad solig‘idan ozod etiladi. Bunday bolalar uchun kunduzgi parvarishlash markazlarini ochgan tadbirkorlar esa 2030-yilga qadar barcha turdagi soliqlardan ozod qilinadi.
Izohlar
Hozircha izohlar yo‘q