Mamlakatda narkojinoiyatlarni aniqlash ko‘rsatkichi 25 foizga oshdi. Bojxona xizmati 785 kg narkotikni musodara qilingani, uchta yashirin laboratoriya yo‘q qilingani va Qoraqalpog‘istondagi operatsiya haqida ma’lumot berdi.
O‘zbekiston bojxona organlari yil boshidan buyon giyohvand moddalarning noqonuniy aylanmasiga qarshi kurashda salmoqli natijalarga erishdi. 14-aprel holatiga ko‘ra, jami 785 kilogramm giyohvandlik vositalarining chegaradan olib o‘tilishi va mamlakat ichidagi savdosiga chek qo‘yilgan. Raqamlarga ko‘ra, narkojinoiyatlarni fosh etish darajasi o‘tgan yilning shu davriga nisbatan 25 foizga o‘sgan. Huquq tartibot idoralari to‘rt mingdan ortiq jinoyatni aniqlashga muvaffaq bo‘ldi, shuningdek, uchta yashirin laboratoriya faoliyati to‘xtatildi.
Umumiy statistika bilan bir qatorda, hududlarda ham keskin choralar ko‘rilmoqda. Xususan, Qoraqalpog‘istonning To‘rtko‘l tumanida bojxona, DXX va Milliy gvardiya xodimlari hamkorligida tezkor tadbir o‘tkazildi. Unda 2,14 gramm geroin moddasini 5 million so‘mga sotmoqchi bo‘lgan shaxs qo‘lga olindi. Tekshiruv davomida uning yonidan yana bir miqdor geroin topilgan. Mazkur holat yuzasidan jinoyat ishi qo‘zg‘atilib, hozirda tergov harakatlari olib borilmoqda.
Izohlar
Hozircha izohlar yo‘q