Toshkent shahar IIBB rezonansga sabab bo‘lgan YTH bo‘yicha shov-shuvli tafsilotlarni oshkor qildi. BMW M4’da inspektorni urib ketgan o‘quvchi muntazam qoidabuzar bo‘lib chiqqan.
Ma’lum bo‘lishicha, 2010 yilda tug‘ilgan 15 yoshli o‘smir muntazam qoidabuzar bo‘lgan, u deyarli inson hayotiga zomin bo‘lishiga sal qolgan qimmatbaho sportkar esa yillar davomida yo‘l harakati qoidalarini pisand qilmagan.
37 ta jarima va “befoyda” va’dalar
Ushbu BMW M4 tarixi huquqiy nigilizmning yorqin misoliga aylangan. Rasmiy ravishda 2002 yilda tug‘ilgan Leyla Atadianova nomida bo‘lgan avtomobil yo‘llarda doimiy xavf manbaiga aylangan.
Statistikaga ko‘ra, 2024 yildan buyon mashina 37 ta qo‘pol qoidabuzarlik sodir etgan. Shuningdek, 18 marta transport vositasi haydovchilik guvohnomasi bo‘lmagan shaxslarga berilgani rasman qayd etilgan.
O‘smirning o‘zi ham avval yo‘lda xavfli harakatlar qilgani uchun to‘xtatilgan. O‘shanda huquqni muhofaza qiluvchi organlar profilaktik suhbat bilan cheklangan, u esa boshqa rulga o‘tirmaslikka va’da bergan. Ammo bu va’dalarning qiymati inspektor hayoti bilan o‘lchanmoqda — u hozir komada.
Maktabga bormas, qonunni tan olmas
Oilaviy tarbiyaga oid tafsilotlar ham ma’lum bo‘ldi. O‘smirning otasi, 1979 yilda tug‘ilgan Zafarjon Kuchkunov, o‘g‘li muntazam ravishda dars qoldirgani va avtomobilni noqonuniy boshqargani uchun avval ham javobgarlikka tortilgan. Ma’muriy choralar ko‘rilganiga qaramay, tegishli xulosa chiqarilmagan.
IIBB e’lon qilgan videoreportajda ota o‘z beparvoligini tan olgan: «O‘g‘lim qotilga aylanishi mumkin edi… Qonun hamma uchun barobar».
Mirobod tumani prokuraturasi Jinoyat kodeksining 266-moddasi (Harakat xavfsizligi qoidalarini buzish) bo‘yicha jinoyat ishi qo‘zg‘atgan. Mazkur modda ozodlikdan mahrum etishni nazarda tutadi.
Videolavhada Uzbelas (Asadbek Jumaev) blogeri ham tilga olingan. Hozircha u hodisaga aloqadorligini rad etmoqda, biroq tergov voyaga yetmagan shaxsning noqonuniy “pokatish”lariga ko‘maklashgan bo‘lishi mumkin bo‘lgan barcha shaxslarni tekshirmoqda.
Eslatib o‘tamiz, hodisa 25 fevral kuni “Mirobod” (Gospital) bozori yaqinida sodir bo‘lgan, unda YPX xodimi BMW M4 Competition avtomobili tomonidan urib yuborilgan.
