Toshkentda BMW avtomobilida YPX xodimi Hosilbek Eshnazarovni urib o‘ldirgan 16 yoshli Doniyor Turg‘unovga sud hukmi o‘qildi. U 2 yilu 4 oyga ozodlikdan mahrum etildi.
Sudlanuvchi O‘zbekiston Respublikasi Jinoyat kodeksining 104-moddasi 3-qismi («O‘limga olib kelgan qasddan badanga og‘ir shikast yetkazish») bo‘yicha aybdor deb topildi hamda unga 2 yil-u 4 oy muddatga ozodlikdan mahrum qilish jazosi tayinlandi. Hukmni chiqarishda sudlanuvchining voyaga yetmagani inobatga olinib, Jinoyat kodeksining 85-moddasi me’yorlari qo‘llandi.
Mudhish hodisa tafsilotlari
Fojiali YTH Toshkent shahri hududida sodir bo‘lgan edi. BMW M4 rusumli avtomobilni boshqargan voyaga yetmagan Doniyor Turg‘unov xizmat burchini o‘tayotgan YPX xodimi Hosilbek Eshnazarovni urib yuborgan.
Olingan og‘ir tan jarohatlari oqibatida huquq-tartibot xodimi shifoxonada vafot etdi. Ichki ishlar organlarida 2022-yildan beri xizmat qilib kelgan marhum xodimning ortidan ota-onasi, turmush o‘rtog‘i va uch nafar farzandi qoldi.
