Akmal Shukurovga yengillik bergan sobiq sudyalar tergov izolyatoridan garov evaziga chiqarildi. Mazkur ish bo‘yicha faqat sud raisining sobiq o‘rinbosari qamoqda qolmoqda.
Toshkent shahar jinoyat ishlari bo‘yicha sudining uch nafar sobiq vakili Akmal Shukurov ishi doirasida tergov izolyatorini tark etdi. Apellyatsiya instansiyasi prokuraturaning qamoq muddatini yana bir necha oyga uzaytirish haqidagi talabini qanoatlantirmadi. Odilbek Ilhomjonov, Mirziyod Abidov va Muxtarama Turg‘unovaga nisbatan ehtiyot chorasi garovga almashtirildi va ular ozodlikka chiqarildi.
Hozirda ushbu jinoiy ish bo‘yicha faqat sud raisining sobiq o‘rinbosari Murodjon Mirzajonov qamoqda qolmoqda. U adolatsiz hukm chiqarishdan tashqari, sud va tergov jarayonlariga noqonuniy aralashishda ham gumonlanmoqda. Tergov versiyasiga ko‘ra, aynan Mirzajonovning bosimi ostida boshqa sudyalar ayblanuvchining jazo muddatini keskin kamaytirish haqidagi qarorga imzo chekishgan.
Sudyalarning javobgarlikka tortilishiga sabab bo‘lgan voqea poytaxtdagi mehmonxonalardan biri oldida yuz bergan edi. Og‘ir tan jarohati yetkazishda ayblangan Akmal Shukurov kutilmaganda sud zalidan ozod etilib, uning sakkiz yillik qamoq jazosi ozodlikni cheklashga almashtirilgan. Bu qaror jabrlanuvchi o‘ta og‘ir ahvolda, koma holatida bo‘lgan bir paytda qabul qilinganligi jamoatchilikning keskin e’tiroziga sabab bo‘ldi.
Vaziyat nazorat tartibida qayta ko‘rib chiqilgach, Shukurovga nisbatan tayinlangan yengil jazo bekor qilindi va u yana qamoqqa qaytarildi. Noo‘rin qaror qabul qilgan sudyalar esa nafaqat lavozimidan ayrildi, balki jinoiy javobgarlikka ham tortildi. Endilikda ular o‘zlariga nisbatan qo‘yilgan ayblovlar bo‘yicha garov ehtiyot chorasi ostida himoyalanishadi.
Izohlar
Hozircha izohlar yo‘q