Farg‘ona shahrida davlat maktabgacha ta’lim muassasalarida tarbiyalanuvchilarning ommaviy zaharlanish bo‘yicha jinoyat ishi ochildi.
Hozirda 62 nafar bola infeksion kasalxonada statsionar davolanishda, shifokorlar ularning holatini qoniqarli deb baholamoqda.
Avval xabar berilganidek, 58-, 2- va 61-sonli bog‘cha bolalari yuqori harorat, qorin og‘rig‘i va diareya belgilar bilan shifoxonaga yotqizilgan.
Shifokorlar ularda «oziq-ovqat manbali keskin diareya» tashxisini qo‘ygan, bu kasallik iste’mol qilingan ovqat bilan bog‘liq bo‘lishi mumkinligini ko‘rsatadi.
Hududiy ichki ishlar boshqarmasida Jinoyat kodeksining 257-1-moddasi bo‘yicha jinoyat ishi ochilgani tasdiqlandi. Tekshiruv doirasida zarur sud-tibbiy va sanitariya ekspertizalari tayinlandi, dastlabki tergov harakatlari o‘tkazilmoqda.
Tekshiruvga sanitariya-epidemiologiya xizmatlari mutaxassislari, maktabgacha va maktab ta’limi tizimi vakillari hamda boshqa profil strukturasi xodimlari jalb qilindi.
Muassasalar oshxonalari tekshirildi, mahsulotlar va tayyor ovqatlardan laboratoriya tahlili uchun namuna olindi.
Bolalar bog‘chalari hududi shahar prokuraturasi va ichki ishlar xodimlari ishtirokidagi tergov-operativ guruhi tomonidan ko‘zdan kechirildi.
Ko‘rik natijalariga asosan protsessual hujjatlar rasmiylashtirildi. Tergov davom etmoqda, yakunida mas’ul shaxslarning harakatlariga huquqiy baho beriladi.
