O‘zbekistonda fuqarolarga o‘z nomiga rasmiylashtirilgan bank kartalari va mobil raqamlarni mustaqil nazorat qilish imkonini beruvchi mexanizm ishga tushiriladi. Yangi vosita 2026-yil dekabrigacha my.gov.uz portalida joriy etiladi.
Gap Yagona interaktiv davlat xizmatlari portali tarkibiga integratsiya qilinadigan funksiya haqida bormoqda. U ishga tushirilgach, foydalanuvchi shaxsiy kabinetida o‘z nomiga ochilgan barcha bank kartalari ro‘yxatini ko‘rishi, shuningdek aloqa operatorlari bazasida nechta SIM-karta ro‘yxatdan o‘tkazilganini aniqlashi mumkin bo‘ladi.
Agar ortiqcha yoki foydalanuvchiga noma’lum mahsulotlar aniqlansa, portal orqali ularni yopish bo‘yicha ariza yuborish imkoni yaratiladi. Shu tariqa, servis amalda shaxsiy moliyaviy va raqamli nazorat vositasiga aylanadi.
Loyiha Prezident farmoni bilan tasdiqlangan davlat dasturi doirasida amalga oshirilmoqda. Uning ishlashi uchun banklar va mobil aloqa operatorlarining axborot tizimlari bilan himoyalangan o‘zaro integratsiya ta’minlanadi. Bu ma’lumotlarning to‘g‘ri va xavfsizlik talablariga rioya etilgan holda uzatilishini kafolatlaydi.
Mazkur funksiyaning joriy etilishi fuqarolarni ehtimoliy suiiste’molliklardan himoya qilishni kuchaytirishi hamda bank va telekommunikatsiya xizmatlari sohasida shaffoflikni oshirishi kutilmoqda.
